Gal 4 | TUCT | STEP | Saveeŋ tsiau tane, puughu tauvene: Isaav ighe tamtamon eta eeza pa ŋginiiŋ gabua naol isov to taama, ene irau iŋginiir gabua tana rekia mako. Saawe tau i kukua, taghita taghe lepoogh tooni, ene iliiv yes besooŋa to taama mako. Pasaa, i ileep ila besooŋa siriv sambazi, ve tiŋgini tomania gabua tooni tawe. Ve i aat ilepleep tauvene le tizaa pa saawe tau taama ighuru na, mako igham gabua tooni tana, ve tauu iŋgin zi.

bGa 3:23

cMt 5:17; Yo 1:14

dYo 1:12; Ro 8:14+; Ga 3:13; 1Pe 1:18+

fRo 8:17; Ga 3:29

g1Kor 8:4+, 12:2

iKol 2:16,20 Hib 7:18

j1Kor 2:3

kRo 8:29; 1Kor 4:15

lGnp 16:15, 21:2

mGnp 17:16+, 18:10+; Ro 9:7+; Hib 11:11

nRo 8:15; Hib 12:22; Syg 21:2,10

pIs 54:1

qRo 9:8

rGnp 21:9; Ga 5:11, 6:12

sGnp 21:10; Yo 8:35

tGa 3:29, 5:1,13

Galatians 4

Iit tamin besooŋa pa tutuuŋ muul mako

1 Saveeŋ tsiau tane, puughu tauvene: Isaav ighe tamtamon eta eeza pa ŋginiiŋ gabua naol isov to taama, ene irau iŋginiir gabua tana rekia mako. Saawe tau i kukua, taghita taghe lepoogh tooni, ene iliiv yes besooŋa to taama mako. Pasaa, i ileep ila besooŋa siriv sambazi, ve tiŋgini tomania gabua tooni tawe. Ve i aat ilepleep tauvene le tizaa pa saawe tau taama ighuru na, mako igham gabua tooni tana, ve tauu iŋgin zi. 3 Yei Yuda tauvene paam. Muuŋ, nileep imin yes geegeu tau ŋgarig gha tighamgham ŋgar. Saawe tana, nibesbees pa tutuuŋ naol tau tisavia gabua to taan. ^{▼▼(4:3) Eez ite to tatoor ziiri tane, ene vene: “Saawe tana, taleep imin besooŋa sorok pa avuvu sasaghati tau tiŋgin gabua siriv to sambam ve taan.”
,} ^b

4 Nileep tauvene le nizaa pa saawe duduuŋ tau Maaron ighuru na, ra imbaaŋ tauu Naatu izilam taan. Livaa ee to taan ipoopa. Ve i ileep ila tutuuŋ saamba, ve itaghon katin tutuuŋ le isov. ^c

5 I ilam to igham mulin yei tau nileep ila tutuuŋ saamba. Leso nimin besooŋa sorok pa tutuuŋ muul sov, ve nimin Maaron natŋa. ^d

6 Ve yam paam, amin Maaron natŋa wa. Tauta Maaron imbaaŋ Naatu Avuvu ila lolomim. Avuvu tawe igham ghiit tapoipoi Maaron taghe: “Abba, tamaŋ” ^{▼▼(4:6) Yes geegeu to Israel tiwatwaat tamazŋa ila tauzi aliŋazi tighe ‘Abba’, imin iit taghe ‘tamaŋ’ o ‘ama’.}

7 Tauvene aazne, yam amin besooŋa sorok muul mako. Pasaa, Maaron igham gham amin i tauu natŋa wa. Ve isaav ighe i natŋa yam, ene ezamim pa ghamuuŋ lepoogh poia ila tooni. ^f

Paulus loolo ibubu pa yes Galesia

8 Muuŋ, yam awatagh Maaron mako. Saawe tana, yam amin besooŋa sorok pa gabua soroksorok naol tau Maaron tauu mako. ^g

9 Eemon aazne, yam awatagh Maaron wa. Aiss, nasaav vene sov. Maaron ta iwatagh gham, ve igham gham amin le wa. Tauvene puughu mindai ta aazne, yam aghur murimim pani, ve aghe amuul pa gabuamim muŋgaana, ve ataghon tutuuŋ naol to taan tau lezi tapirizi irau to tiuul gham mako na? ^{▼▼(4:9) Eez ite to tatoor ziiri tane, ene vene: “Tauvene puughu mindai ta aazne, yam aghur murimim pani, ve aghe amuul pa gabuamim muŋgaana, ve amin besooŋa pa avuvu siriv tau lezi tapirizi irau to tiuul gham mako na?”} 10 Aazne, yam matamim iŋgalŋgal saawe tau kaiyo izaa paaghu, ve saawe to ndaman paaghu, ve saawe siriv ta aghur zi timin saawe to suŋuuŋ itaghon ŋgar to yes Yuda. ⁱ

11 Tauta agham ghau lolog ibubu pa uraat tiina tau naghamu ila sosomim na. Pale ighur anooŋa, ma imin kaut sorok?

Paulus itaŋ rarai yes Galesia

12 Yam toŋvetaz, aghita. Yau napul eez to taghoniiŋ tutuuŋ, ve nataghon yam tau Yuda mako na pa gabuamim. Tauvene aazne, nataŋ rarai gham naghe atoor ŋgar tsiam, ve amuul alam ataghon ghau pa ŋgar tau yau naghamghamu ne. Saveeŋ tsiau tane, nasavia pasaa, naghe yam agham sosor payau, ene mako. Yam awatagh: Saawe imin maata tau nalat navotia vaaru poia payam, yau namorooŋ, tauta nazalat naleep tomani gham. ^j

14 Moroghooŋ tsiau tana igham pataŋani tiina payam. Eemon matamim veleghin ghau, ma azor ghau mako. Yam apakur ghau kat, imin yau aŋela eta to Maaron, ma Yesu Krisi tauu. 15 Saawe tana, yam tintinmim kat pa poia to Maaron tau izaa tsiam. Eemon aazne, tintinmim muul mako. Ene mindai? Onoon kat, yau nasaav payam: Saawe tana, lolomim pa uleeŋ ghau kat. Irau aŋguruut gabua eta payau mako. Imin ta yam irau auul ghau pa matamim, kanaŋ apasu ve agham payau! 16 Mindai, yau nasavia saveeŋ onoon payam, tauta aghe naghur koi payam?

17 Zeran tau tizuari zi pa ghamuuŋ lolomim na, ŋgar toozi poia mako. Yes tighe tigham gham amoghaagh payau, leso ataghon zi pa ŋgar toozi. 18 Saawe isov, isaav ighe tazuari ghiit pa ghamuuŋ ŋgar popoia, ene poia. Tauvene saawe tau naleep tomani gham mako, yam aat matamim kisin ŋgar poia ve ataghoni. 19 O natugŋa, ŋgar tau aghamu na, ene igham pataŋani tiina payau muul imin zilivaa tau apozi iyavyav pa popaaŋ. Ve yau aat nabaad pataŋani tane le irau ŋgar to Krisi ivot imin tiina ila lolomim. ^k

20 Oyai, pale nagham mindai payam? Aazne naleep malau payam. Imin ta itiŋa taleep, kanaŋ alooŋ saveeŋ duduuŋ ila avog ve nasavia saveeŋ popoia siriv to napaghazoŋai ŋgar tsiam.

Saveeŋ palelaaŋ to Agar gha Sara

21 Yam tau aghe aleep ila tutuuŋ saamba na, asaav payau lak. Yam alooŋ saveeŋ to tutuuŋ, ma mako? 22 Pa Maaron aliiŋa tau tiboode na isaav tauvene: Abaram natŋa ru. Ee, ivot ila to Agar, i livaa tau besooŋa sorok na. Ve ite ivot ila to azaawa Sara, tau ruum tauu na. ^l

23 Besooŋa livaa naatu, i ivot itaghon eez to iit tamtamon to taan. Ve livaa tau ruum tauu na naatu, i ivot itaghon saveeŋ mbuaaŋ to Maaron. ^m

24 Saveeŋ tane, ene imin saveeŋ palelaaŋ. Pasaa, zilivaa ru tawe titotoi ghiit pa eez ru tau Maaron ighuru pa tamtamon. Agar, i imin eez to tutuuŋ tau ivot izi loloz Sinai. Yes tau titaghon eez tawe na timin besooŋa sorok. 25 Loloz Sinai, ene igheen taan sirivu to Arabia. Agar imin loloz tawe ve nugh Yerusalem tau aazne igheen izi taan ne. Pasaa, nugh tawe tamtamona timin besooŋa sorok pa tutuuŋ. 26 Eemon Yerusalem tauu ta igheen izi sambam na, tamtamona timin besooŋa mako. Yes nugh tauŋa. Yerusalem tawe, ta imin iit tinaan. ⁿ

27 Pasaa, Maaron aliiŋa tau tiboode na isaav ighe:

“Yo livaa tau upoop mako na, tintinim!
Yo livaa tau uyamaan yavyavuuŋ pa popaaŋ soone na, lolom poia ve aliŋam izaa!
Pa livaa tau azaawa ighur muuri pani na, pale natŋa katini ve tiliiv livaa tau i le azaawa na natŋa.” ^{▼▼(4:27) Muuŋ, lupuuŋ to yes Israela tomania Maaron poia. Eemon yes eval mako. Saawe tana, yes tileep imin livaa tau i le azaawa. Eemon saawe naol, tizoor Maaron aliiŋa. Tauvene murei, i ighur muuri pazi, ve ipul zi tila yes Babilona ve nugh siriv nimazi. Saawe tana, tileep imin livaa tau ipoop mako, ve azaawa ipuli. Aazne, ila uraat to Krisi, Maaron igham eval to nughmariŋ timin i natŋa. Yes Yuda, ve yes tau Yuda mako na paam. Yes tana ta timin Yerusalem to sambam natŋa.
,} ^p
28 Yam toŋvetaz, yam amin Sara naatu Isak. Pasaa, saveeŋ mbuaaŋ to Maaron imin eez payam gha amin i tauu natŋa. ^q

29 Ve matamim iŋgal imuul ila pa ŋgar tau muuŋ Ismael igham pa Isak na. Ŋeer tau ivot itaghon eez to iit tamtamon to taan na, ighur pataŋani pa taazi tau ivot ila Maaron Avuvu tapiri. Aazne, ŋgar raraate ivotvot. Pasaa, yes tau titaghon eez to tutuuŋ na, tighurghur pataŋani pa iit tau Maaron Avuvu igham ghiit tamin i tauu natŋa na. ^r

30 Ve Maaron aliiŋa tau tiboode na isaav mindai? Isaav tauvene ighe:

“Uziir besooŋa livaa yesuru naatu tighau! Pa besooŋa livaa naatu irau ileep tomania livaa tau ruum tauu na naatu, ve yesuru tiyooz pa gabua to tamazi ne mako.” ^s
31 Tauvene yam toŋvetaz, alooŋ. Iit besooŋa livaa natŋa mako. Iit tinaan, i ruum tauu. ^t